Teks Autobiografi "Rahmatullah Ading Affandie"
Rahmatullah Ading Affandie
Dina ijasah-ijasah
tanda tamat sakola, dina bisluit-bisluit kadinesan, titimangsa dilahirkeun téh ditulis
2 Oktober 1928. Tapi sakapeung, dina Kartu Tanda Penduduk (KTP), dicatet 2
Oktober 1929. Sarua ari tempatna mah di Désa Banjarsari, puseur kota kacamatan.
Persisna mah di Kampung Cibadak. Ari Banjarsari kabawa ka Kabupaten Ciamis.
Perehna di jajalaneun antara Banjar-Pangandaran.
Henteu. Teu aya
"akta kalahiran" anu bisa dijadikeun cecekelan nu pasti dina
titimangsa kalhiran. Sabab harita mah, ngan urang kota nu lumrah nyarieun akta
lahir téh. Kitu gé urang kota anu kaasup "priyayi" (pagawé negeri). Di
kampung mah sagala rupa kajadian téh cukup ku dirangkepkeun jeung kajadian
penting , saperti mimiti aya karéta api anu tembus nepi ka Cijulang. Atawa basa
angeus pisan nyieun sasak beusi Walungan Ciputrahaji. Atawa deui, basa Ir.
Sukarno dibuang ka sabrang, jeung sabangsana. Atawa sok dicatet ku kapur, dina
panto. Da kitu umumna di kampung (harita) mah. Nu nginjeum paré, titimangsa
ngagadé sawah, budak dilahirkeun, jeung sajabana. Cenah, titimangsa kalahiran
kuring gé dicatetkeun dina panto. Ngan basa kuring lembut kénéh, imahna diruag,
nepi ka leungit catetan oténtik téh.
Padahal sakuringeun
mah pasti aya catetan resmi. Sabab basa dilahirkeun téh, bapa keur jeneng jadi
jurutulis Camat Banjarsari, kaasup priyayi. Jadi pasti, aya dina catetan kapagawéan.
Ngan nepi ka kuring gedé, teu kungsi kapaluruh, sabab bapa pupus taun 1934 keur
kuring budak kénéh pisan. Bapa mantenna jadi Jurutulis Kabupatén Tasikmalaya.
Jauh méméh kuring (sok) butuh ku catetan resmi titimangsa kalahiran.
Bapa kuring jenenganana
Udintapura, pupus di Tasikmalaya taun 1934, bangunna mah dina yuswa 30 taun.
Wani nyebut yuswana sakitu téh diukur tina sasama mantenna anu paranjang
yuswana. Harita bumina di Babakan Domba, dikurebkeun di Cinéhél. Kuring gé ngan
asa inget-inget poho kana pameunteuna. Minangka apal téh pédah aya potrét anu
ku kuring dicitak ulang (diréproduksi). Opatan, Bapa, Mamah, Ki Lanceuk, jeung
kuring umur sataun kira-kira. Aya nepi ka ayeuna.
Basa Bapa pupus téh
geus teu sabumi jeung Mamah. Méh dua taun méméh pupusna, pipirakan. ,a,ah mulih
ka bumi ibu-ramana (ka Éyang) ka Bojong Ciamis, ari Bapa nikah deui ka urang
Garut. Ka Nyi Radén Téjajumala, biasa disebut Bi Éja atawa Bi Énden.
Mamah ()indung
kuring) jenenganana Nyi Kulsum Ratnapermana, bibit buit Sindanghéréng ,
Panjalu. Tilu putra Mamah jeung Bapa téh. Tiluanana lalaki. Nu cikal Hidayat
(Adung/Édi) lahir taun 1962, wafat taun 1978. Kuring nu panengah, Affandieu
(Ading), jeung nu bungsu Harmaén (Adéng) lahir taun 1932, wafat taun 1990.
Sanggeus Bapa pupus,
barudak yatim putra-putra Mamah téh dipencarkeun. Si Cikal dicandak ku Ua Guru
anu geus ngalih ti Cibalong ka kota (Tasikmalaya). Si Bungsu angger jeung Mamah
di Bojong. Ari kuring dicandak ku Mang Karya (Karyasasmita) ka Sukabumi, basa
kabeneran Mang Karya naék pangkat tina guru bantu di Pamalayan, jadi Mantri
Guru di Sukaraja, Sukabumi. Istri Mang Karya (Bi Odah) téh, rai Mamah
pangalitna. Sasatna ku Mamah dirangkepkeunana ka Mang Karya téh. Di Banjarsari.
Najan can manjing
sakola (kakara 5 taun), ku Mang Karya kuring disakolakeun di Sakola Désa (SD 3
taun). Sakola rada jauh ti imah, persis dina puhu tanjakan Gentong. Nepi ka
ayeuna lamun pareng ngaliwat, sok dirérét (urut) Sakola Désa éta téh. Sok nyéréngéh ari nénjo
perenahna. Da rarasaan baheula mah asa lungkawing pisan gawir gigireun sakola
téh. Nu anéh téh nepi ka ayeuna asa sok kacipta rupi (“juragan”) guruna. Taun
llima puluhan mah malah kungsi ku kuring dipapay, panasaran. Tapi geus pupus
harita ogé.
Bangunna melang
Mamah téh tilu putra dipencarkeun di tilu tempat. Nu matak méméh sataun, ku
Mamah ku anjeun kuring dipapagkeun, dicandak deui, dicandak ku Ua Guru,
dihijikeun jeung Ki Lanceuk (Adung/Édi).
Di Kaléktoran bumi
téh. Harita Ua keur jadi guru bantu di sakola Vervolg Cipedes, di Kota
Tasikmalaya beulah Kulon. Ua Guru jenengan lengkepna Émo Suwitaatmaja, putra
Éyang nomor dua, rakana pisan Mamah. Dibabarkeun taun 1899 di Sindangbarang,
daérah panjalu.
Posting Komentar untuk "Teks Autobiografi "Rahmatullah Ading Affandie""